السلام عليكم ورحمة الله وبركاته
يمكن ما يكون موضوعي مزبرق وملوّن مثل المواضيع الثانية ... لكنه أكيد نابع من القلب
وأتمنى إن شاء الله يكون للقلب ..
" الحب أقوال أم أفعال؟ "
سؤال دار ولا يزال يدور ببالي لسنوات .. وأشوف الإجابات كلها عكس اللي انا مقتنع فيه ..
هل معقولة إن كل الناس مو فاهمين الحب على حقيقته وأنا الوحيد الفاهم بينهم؟
ولا أنا مجرد إنسان شاذ عن المجتمع بطريقة تفكيري وقناعاتي؟
هل فعلا الحب مجرد كلام؟ حروف لا أكثر ولا أقل؟ أقرب ماتكون هي إلى المجاملات؟
أم هو أفعـــــــال؟
هل إذا جلست معها بوقت الضحى بأحد الأيام وحدنا .. وجلسنا نتكلم مع بعض ونضحك مع بعض .. وإذا شفت ملامحها وهي تضحك ما توسعني الدنيا من الفرحة ... هل هذا ماله معنى؟
هل إذا صحيت من النوم ولقيتها نايمه جنبي ... وبدال ما أقوم ... جلست أتامل في وجهها وهي نايمه وكأنها كتلة من البراءة نايمة جنبي ... مع إن شعرها أشعث .. ووجهها عاري من كل مواد التجميل .. إلا إني أشوفها تشع من الجمال والحنان اللي فيها ... هل هذا ماله معنى؟
هل إذا ناظرتها وهي تناقشني بجدية وأشوف نظرة عيونها وحركات ايدينها .. وأقابلها بابتسامه (بيني وبين نفسي) وأعجب فيها أكثر وأكثر لشخصيتها ... هل هذا ماله معنى؟
هل إذا غلطت علي بيوم .. عذرتها ....... وحتى لو ماكان لها عذر ........ عذرتها ... هل هذا ماله معنى؟
وإذا سوت لي طبخة جديدة على إنها بتفاجئني .. وكانت ملخبطة الأكله فوق تحت .. وبدال ما أعاتبها أو اقول لها أي ملاحظات .. ماأقولها غير "من إيد ما نعدمها" .... هل هذا ماله معنى؟
وإذا تعبت بيوم من الأيام .. وسهرت طول الليل وأنا أهتم فيها وأراعيها .. وأسوي روحي نايم بجنبها عشان ما يأنبها ضميرها وأنا بالحقيقة ما غمض لي جفن من خوفي عليها ... هل هذا ماله معنى؟
وإلا إذا بيوم من الأيام فجأة وبدون أي مقدمات وحنا بوسط جلستنا وسواليفنا قلت لها "الله يخليك لي" ... هل هذا ماله معنى؟
هل فعلاً ماله معنى؟ معقوله تكون كل هالأشياء مجرد أشياء عادية محد يحس بغلاتها؟
هل فعلا أنتم تعتقدون إن كلمة (( أحبك )) أغلى من كل هالأشياء اللي ذكرتها؟
ياليت تقنعوني ... لأني تعبت وأنا أدور الإجابة اللي أبيها ..
الإثنين 14 أكتوبر 2019 - 12:40 من طرف 
